1961 wörd fort jarst tooch et iirbök tuhuupe ma di Nordfriesische Verein ütdänj, ouf 1964 dan arks iir. Dåt wus en dütlik tiiken, dåt e strid twasche tjüsch än dånsch ålsani maner wörd. Önj Tjüschlönj än Dånmark wörden’s wis, dåt et mat friisk bloot dan foramkaame köö, wan biise side önj e friisk manerhäid tuhuupeårbeden. E dånsch regiiring än et lönj Slaswik-Holstiin wänj nü forheewen stipe, wat jam da friiske üt biise loogere tuhuupe fornümen. Twäär maårbere foont nordfriisk uurdebökstää foon e uniwersitäät Kil såchen jare kånt: Di spräkemoon Tams Jörgensen än di historiker Dr. Hans Christian Nickelsen köön et stjör foon e instituutsferiin ouertjööge – uk wan et stjör deer jarst goorai for wus – nü en wörklik Nordfriisk Instituut tu grünleeden. Et forbil wus e Fryske Akademy önjt weestfrasch Ljouwert, uk wan jü foole gruter wus än as. Önj Aalkersem aw Feer wörd di 30. august 1964 iinstämi beslin, dåt et Nordfriisk Instituut grünläid wårde schölj. Di 31. august 1965 begand et Nordfriisk Instituut önj äine dörnsche önj e Bräistinger Osterstraße 63 tu årben ma tra lektoore, iinj sekreteerin, maning iirenåmtlike maårbere än ålsani uk ma en äin waasenschaplik biblioteek.
Tams Jörgensen (spräkelektoor än instituutsbåås, 1965–1984)
Hans Christian Nickelsen (lektoor for histoori än regjonåål-stuudie, 1965–1972)
Reimer Kay Holander (lektoor än geschäftsfäärer, 1965–1986)
Janny Holander (sekretarioot, 1965–1986)
Reinhard Arfsten, Fering Wurdenbuk (1965)
Alexander Eckener / Lauritz Thamsen, Dat swarte peerd/Di suurte hängst (1967)
James Krüss, Wät laitje börne haal mäie (önj seeks spräkewise) (1969)
Reimer Kay Holander / V. Tams Jörgensen, Nordfriesland/Nordfriislon 1:100.000 (twäärspräked koord) (1970)
Nann Mungard, Ein Inselnordfriesisches Wörterbuch I (1974)
Wilhelm Jessen, Sylter Sagen (1976)
Alastair Walker / Ommo Wilts, Hiir Frasch – Liir Frasch (spräkekurs ma kasät) (1976)
Peter Sax, Werke zur Geschichte Nordfrieslands und Dithmarschens (soowen biinje, 1983–1989)
Studien und Materialien (ouf 1967), Friisk Komeedibiblioteek (ouf 1968), Schrafte foon e IGB (ouf 1984)
Jarling (nordfriisk kaländer, foon ouf 1977)
Et instituut önj e Osterstraße
Da jarste lektoore: Tams Jörgensen, Reimer Kay Holander än Christian Nickelsen (f.l.)